ന്യൂമാഹി :ന്യൂ മാഹി ഗ്രാമപഞ്ചായത്ത് നടത്തുന്ന ന്യൂമാഹി ഫെസ്റ്റിനുള്ള ഒരുക്കങ്ങൾ പൂർത്തിയായതായി സംഘാടകർ അറിയിച്ചു.
22 ന് തുടങ്ങി 11 ദിവസം നീണ്ടു നില്ക്കുന്ന ഫെസ്റ്റ് ജനുവരി ഒന്നിന് സമാപിക്കും. 21 ന് വൈകുന്നേരം പെരിങ്ങാടി എം.മുകുന്ദൻ പാർക്കിന് സമീപത്ത് നിന്നു തുടങ്ങുന്ന ഫെസ്റ്റിൻ്റെ വിളംബര ജാഥ ന്യൂമാഹി ടൌണിന് സമീപത്തെ ഫെസ്റ്റ് നടക്കുന്ന വേദിയിൽ സമാപിക്കും. ഫെസ്റ്റിൻ്റെ ഉദ്ഘാടനം 22ന് വൈകുന്നേരം 6.30ന് മയ്യഴിയുടെ കഥാകാരൻ എം.മുകുന്ദൻ ഫെസ്റ്റ് ഉദ്ഘാടനം ചെയ്യും. തുടർന്ന് സിനിമാ താരം നിർമൽ പാലാഴി അവതരിപ്പിക്കുന്ന കോമഡി ഷോയും ഡാഫോഡിൽസ് നയിക്കുന്ന സംഗീത രാവ് – മ്യൂസിക്കൽ നൈറ്റും നടക്കും. 23 ന് ഗ്രാമീണ കലാസന്ധ്യ, 24 ന് കുടുംബശ്രീ പ്രവർത്തകരുടെ നേതൃത്വത്തിലുള്ള വിവിധ കലാപരിപാടികൾ, 25 ന് ക്രിസ്മസ് ദിന സമ്മേളനം, മെഗാഷോ, 26 ന് കലാസന്ധ്യയും കളരിപ്പയറ്റ് പ്രദർശനവും, 27 ന് ഭക്ഷ്യ മേള, വൈകുന്നേരം ഫുട്ബോൾ ടൂർണ്ണമെൻ്റ്, 28 മുതൽ 31 വരെയുള്ള ദിവസങ്ങളിൽ രാത്രി വിവിധ കലാപരിപാടികൾ എന്നിവയും നടക്കും. ഒന്നിന് വൈകുന്നേരം സമാപന സമ്മേളനം സ്പീക്കർ എ.എൻ.ഷംസീർ ഉദ്ഘാടനം ചെയ്യും. വിവിധ മേഖലകളിൽ വ്യക്തിമുദ്ര പതിപ്പിച്ച പ്രമുഖ വ്യക്തികളെ ചടങ്ങിൽ ആദരിക്കും. സിനിമാ പിന്നണി ഗായിക കീർത്തന ശബരീഷ് നയിക്കുന്ന ഗാനമേളയോടെ ഫെസ്റ്റ് സമാപിക്കും. ഫെസ്റ്റിൻ്റെ ഭാഗമായി മയ്യഴിപ്പുഴയിൽ ബോട്ടുസവാരി തുടങ്ങിയിട്ടുണ്ട്. അമ്യൂസ്മെൻ്റ് പാർക്ക്, വിനോദപരിപാടികൾ, ഫുഡ് കോർട്ട്, വ്യാപാര സ്റ്റാളുകൾ എന്നിവയുണ്ടാവും. ഇത് സംബന്ധിച്ച് ചേർന്ന യോഗത്തിൽ സംഘാടക സമിതി ചെയർമാൻ
അർജുൻ പവിത്രൻ അധ്യക്ഷത വഹിച്ചു.
സംഘാടക സമിതി ഭാരവാഹികളായ ടി.എച്ച്. അസ്ലം, കെ.എ. ലസിത, ആർ.അരുൺ ജിതേഷ് എന്നിവർ പ്രസംഗിച്ചു.